ПОСЛЕДОВАНИЕ МАЛОЙ ПАНИХИДЫ
(заупокойной литии без священника)

Три поклона с молитвою мытаря:
Боже, милостив...

За молитв святых отец наших, Господи, Исусе Христе, Сыне Божии, помилуй нас.
Аминь. [поклон]

Тропарь, глас 2.
Помяни, Господи, яко Благ, рабы Своя
и елика в житии сем согрешиша, прости,
никтоже бо без греха, токмо Ты
могии преставленным дати покой.

Ин тропарь, глас 8.
Иже глубинами мудрости, человеколюбне вся строя,
и еже на пользу всем подавая, Едине Содетелю.
Покой, Господи, душа усопших раб Своих,
на Тя бо упование возложиша,
Творца и Зиждителя и Бога нашего.

Слава, кондак, глас 8.
Со святыми покой, Христе, душа раб Своих,
идеже несть болезни, ни печали, ни воздыхания,
но жизнь вечная.

И ныне, богородичен, глас 8.
Тебе град и пристанище имамы,
и Молитвенницу благоприятну к рождьшемуся из Тебе Богу,
Богородице Безневестная, верных спасение.

Ектения: Господи, помилуй (40 раз) и молитва об упокоении:
Помяни, Господи Боже, иже о вере и о надежди живота вечнаго, усопших раб Твоих имя рек, яко Благ и Человеколюбец, превосходя грехи и потребляя неправды, ослаби, остави, прости все вольное их согрешение и невольное, возставляя тех во святое второе пришествие Твое, в приобщение вечных Ти благ. О нихже в Тя Единаго вероваша, Истиннаго Бога и Человеколюбца. Яко Ты еси Воскресение и живот и покой Твоим рабом, Христе Боже наш, и Тебе славу возсылаем, со Безначальным Ти Отцем и с Пресвятым Духом, ныне и присно и во веки веком.
Аминь.

Посем:
Честнейшую херувим, и славнейшую воистину серафим, без истления Бога Слова рождьшую, сущую Богородицу Тя величаем. [поклон]
Слава Отцу и Сыну и Святому Духу. [поклон]
И ныне и присно и во веки веком. Аминь. [поклон]
Господи, помилуй, (дважды). Господи, благослови. [поклон]

И отпуст:
Господи, Исусе Христе, Сыне Божии, молитв ради Пречистыя Ти Матере, преподобных и Богоносных отец наших и всех святых, помилуй и упокой душа раб Твоих в безконечныя веки, яко Благ и Человеколюбец.
Аминь.

Рабом Божиим преставльшимся, отцем и братиям нашим, и всем православным християном, о них же и поминание творим: вечная память. [трижды]

Тропарь:
Покой, Господи, душа усопших раб Своих имя рек, [поклон]
и елика в житии своем, яко человецы, согрешиша,
Ты же, яко Человеколюбец Бог, прости их и помилуй, [поклон]
И вечныя муки избави, [поклон]
Небесному Царствию причастники учини, [поклон]
и душам нашим полезная сотвори. [поклон]

Сие глаголем трижды, а поклонов пятнадесять.
И по сем три поклона с молитвой мытаря:
Боже, милостив буди…