Благодарственные молитвы по Святом Причащении

Егда же получиши дражайшаго приобщения, Животворящих и тайных Даровании, воспой абие и благодари зело. И сия тепле от души Богови глаголи:

Молитва 1-я, святаго великаго Василия, по святом Причащении.

Благодарю Тя, Господи Боже мой, яко не отринул мя еси грешнаго, но общника мя быти священий Твоих сподобил еси. Благодарю Тя, яко мене недостойнаго, причаститися Пречистых Твоих Небесных Даров сподобил еси. Но о Владыко Человеколюбче, нас ради умер же и воскрес, и даровав нам страшных сих и животворных Таинств. Даждь быти сим мне во исцеление души же и телу, во отгнание всякаго сопротивнаго, в просвещение очию сердца моего, в смирение душевных ми сил, в веру непостыдну, в любовь нелицемерну, во исполнение премудрости, в соблюдение заповедей Твоих, в приложение Божественныя Ти благодати, и Твоего Царствия присвоение. Яко да святынею Твоею сохраняемь, Твою благодать поминаю всегда. и не ктому себе живу, но Тебе, нашему Владыце и Благодателю. и тако сего жития исшед, о надежди живота вечнаго в присносущныи дойду покой, идеже празднующих глас безконечный, и непреходима сладость, зрящих Твоего лица доброту неизреченную. Ты бо еси истинное желание и неизреченное веселие любящым Тя, Христе Боже наш, и Тебе славит вся тварь во веки. Аминь.


Молитва 2-я, святаго Иоанна Златоуста.

Благодарю Тебя, Человеколюбче Господи, яко многия Ти ради благости, утерпе причастника мя быти, Пречистому Твоему Телу, и Честней Крови, и не возгнушася яко осквернена, ниже яко приятию святынь Твоих недостойна, невидимою Божественною силою отрину. Но благоволил еси мене грешнаго, безсмертною Твоею напитатися трапезою. Юже животворную Ти благодать неизменну и неотъемлему в смиренной ми души соблюди, и просвещение Твое неугасимо от мене сотвори. Просвещая ми всяко разумение, и всяко чувство. Неприкосновенна мя соблюдая, и непреткновенна от мрачнаго греха, еже славити и благодарити Тя всегда. И по Твоему ходити хотению, во вся дни живота моего, молитвами Пречистыя Владычицы нашея Богородицы и присно Девы Марии, и безплотных Ти служитель, и всех святых, иже от века Тебе благоугодивших, Аминь.


Молитва 3, святого Иоанна Златоустаго.

Владыко Христе Боже, Царю веков и Содетелю всех, благодарю Тя о всех, яже ми еси дал благая, и о причащении Пречистых и Животворящих Твоих Таин. Молютися Благии Человеколюбче, сохрани мя под кровом крилу Твоею; и даруй ми чистою совестию до последняго издыхания, достойно причащатися священии Твоих, во оставление грехов и в жизнь вечную. Ты бо еси Хлеб Животный, и Источник святыни, и Податель благих. и Тебе славу возсылаем, со Безначальным Ти Отцем и с Пресвятым и Благим и Животворящим Ти Духом, ныне и присно и во веки веком. Аминь.


Молитва 4, святаго Иоанна Златоустаго.

Причистаго Ти Тела, и Честныя Ти Крове тайно сподоблься быти спричастник Христе Боже, воспеваю и благословлю, покланяюся и славлю, и величаю спасения Твоя, Господи, ныне и всегда, и во веки веком, аминь.


Молитва 5, святаго Иоанна Дамаскина.

Владыко Боже мой, непостоянныи и невидимыи Огню, Иже ангелы Своя Огнь палящь соделовая, Иже несказанною Ти любовию, предал ми еси в снедь Божественную Ти Плоть, причастника мя приемыи Своего Божества, ради приобщения Пречистаго Ти Тела, и Честныя Ти Крове, пройди все мое тело и дух, во вся моя кости и мозги, грехи моя попаляя, душу мою просвещая, ум мой уясняя, тело освящая, и обитель сотворяя во мне с Благословенным Отцем Своим, яко да и аз буду в Тебе присно, молитвами Пречистыя Ти Матере, и всех святых Твоих, аминь.


Молитва 6, святаго Кирилла Александрийскаго.

Тело Твое Святое Господи Исусе Христе Боже мой, да будет ми в живот и освящение, и Кровь Твоя Честная, во оставление грехов и в жизнь вечную. И на святем Твоем суде постави мя одесную Тебе. Буди же ми благодарение сие в радость, и здравие, во исцеление души же и телу, яко благословен еси во веки, аминь.


Молитва 7-я, святого Симеона Метафраста.

Давый пищу мне Плоть Свою волею, Иже Огнь сый опаляя недостойныя, да не опалиши мене Содетелю мой, но паче вниди во уды моя действенне, и во вся составы, во утробу и сердце, попаляя терние всех моих согрешении. Душу очисти, и освяти вся помышления. Мысли утверди с костьми вкупе, чувством просвети правую пятерицу. Всего мя пригвозди страху Твоему, всегда покрывая же и соблюдая, и храня мя от всякаго дела и слова душетленна. Очисти, омый, и просвети мя, удобри и вразуми,. покажи мя жилище Твоего Единаго Духа, и не ктому жилище буду греху, да яко Твой храм, входом причащения, яко огнь попалит всяко злодейство, и всяку страсть, иже во мне. Молитвенники Ти приношу вся святыя, чиноначалия же безплотных, и Предотечу Твоего, и премудрыя апостолы, к сим же и Пречистую Ти Матерь. Ихже мольбы приими Милосерде Христе Боже мой, и свету мя Твоему сына яви, и служителя Себе покажи. Ты бо еси Освящение Единый, нашим Блаже душям и светлость. И Тебе подобно яко Богу и Владыце, славу вси возсылаем, во вся дни живота нашего, ныне и присно и во веки веком. Аминь.


Молитва 8, ко Пресвятой Богородице.

Пресвятая Владычице Богородице, свете помраченныя ми души, надежде, и покрове, прибежище и утешение, и возрадование мое, благодарю Тя, яко сподобила мя еси недостойнаго, причастника быти Пречистому Телу и Честней Крови Сына Твоего. Но рождьшая Истинныи Свет, просвети ми умныя очи сердца, Яже Источник безсмертия рождьшая, оживотвори мя, умерщвена грехом; Яже милостиваго Бога любоблагосердая Мати, помилуй мя, и даждь ми плачь, и сокрушение в сердцы моем, и смирение в мыслех моих, и возведение в плененных помыслех. И сподоби мя до последняго издыхания, неосужденно приимати Пречистых Таин освящение, во исцеление души же и телу. И подаждь ми Владычице слезы покаяния и исповедания, во еже пети и славити Тя, во вся дни живота моего. Яко благословена и препрославлена еси во веки. Аминь.


Молитва 9, святаго Германа Пресвятей Богородице.

О Преблаженная Госпоже Дево Владычице Богородице, умоли Сына Своего, Избавитися нам от всякаго зла. Тобою бо Госпоже Сына Божия познахом. И сподобихомся причастницы быти Честныя и Пречистыя Крове Его и Плоти, чающе доити Твоими молитвами вечныя жизни, славяще Отца и Сына и Святаго Духа, ныне и присно и во веки веком, аминь.


Молитва 10, по святем причащении.

О Господи Живыи, благодарю Тя с трепетом, естеством бо яко огнь, не опаляеши, но питаеши. Проиди убо сквозе уды моя действенно, и во вся составы, во утробу и сердце. Очисти, отмый всяку скверну, чувством соочищая пяторицу.

Таже, Достойно есть.

Трисвятое и по Отче наш.

Тропари и кондаки, настоящему дни, и его же есть обитель.

Слава и ныне, кондак:
Вечери твоея тайныя.

Господи, помилуй, 12.
Иерей глаголет: Слава Тебе, Боже наш, Упование наше, слава Тебе.

Слава и ныне, Господи помилуй, дважды, Господи, благослови.

И отпуст глаголет сице:
Христос Истинныи Бог наш, молитвами Пречистыя Его Матере, и иже во святых отец наших, Василия Великаго, и Иоанна Златоустаго, и Кирилла архиепископа Александрийскаго, и Софрония патриарха Иерусалимскаго, и Германа патриарха царя града, и преподобных и Богоносных отец наших, Иоанна Дамаскина, и Симеона новаго Богослова, и преподобныя матере нашея Марии Египтяныни, и преподобнаго отца нашего Онуфрия великаго, и всех святых помилует и спасет нас, яко Благ и Человеколюбец.

Таже, Господи помилуй, 3 раза.

 


<< назад на "БОГОСЛУЖЕНИЕ"