КАНОН СТРАДАЛЬЦАМ СОЛОВЕЦКИМ
(память их 29 января)
Тропарь, глас 1.
Наздани
на основании апостол и пророк, сущу краеугольну Самому Исусу
Христу, соловецтии отцы, не поколебашася бурею ересей, и волнами
воинских нахождений и мук, тем же молитвами их Церкви Божия
утверждается, и мы вернии спасаемся от всякаго зла
(дважды).
Слава, и ныне.
Богородичен. Гавриилу провещавшу Ти, Дево, еже
радуися, и со гласом воплощашеся всех Владыка в Тебе, Святем
Кивоте, якоже рече праведныи Давыд, явися пространнейши небес,
поносивши Зиждителя Своего. Слава Всельшемуся в Тя, слава
Прошедшему из Тебе, слава Свободившему нас Рожеством Твоим.
Канон, глас 6.
Песнь 1, ирмос.
Волною
морскою скрывшаго древле гонителя мучителя под землею скрыша
спасеных дети, но мы, яко отроковица Господеви поем, славно бо
прославися.
Запев: Святии
преподобномученицы и исповедницы, молите Бога о нас
(поклон).
Сошедшеся днесь,
христоименитии людие, в церковь святую, воспоем трубою песней
великих исповедников соловецких, Господеви поюще, славно бо
прославися.
Запев.
Им же главы отсекоша, и обешением удавиша, и
мразом и в темницах умориша, или инако умучиша за веру Христову,
молимся, яко мучеником Господним.
Слава.
И земля, и вода, и воздух освятишася вами
блажении, предаваху бо вас смерти мучители и на земли и на воде,
и на воздусе, но не победиша вы.
И ныне.
Богородичен. Призри на рабы Своя, пореваемыя от
враг видимых и невидимых Владычице, и укроти воюющих с нами, мир
Свой подавая нам.
Катавасия: Избавите от
бед рабы своя, святии преподобномученицы и исповедницы, яко вси
по Бозе к вам прибегаем, вы бо молите о нас Христа Бога нашего
(поклон).
Господи помилуй
(трижды, с поклонами).
Песнь 3, ирмос.
Несть свята, якоже Ты Господи Боже мой,
вознесыи рог верных Си Блаже, и утверждь их на камени
исповедания Ти.
Запев.
Многолетно обдержаху святую обитель Соловецкую
воеводы, требующе исполнити нечестивое повеление отступити от
веры отеческия, но всуе труждахуся.
Запев.
Воини убо отражаху противных, злобно нападавших на
святую обитель, еже погубити преподобных, прочии же моляхуся
Богу, да спасет Свое достояние имиже весть судьбами.
Слава.
Предавыи монастырь преподобных, вторыи искариот
Феоктист, гневом Божиим поражен, от срамныя болезни жив согни,
зле издше, мученицы же торжествуют на небесех.
И ныне.
Богородичен. Яко от горы отсечеся от Тебе
Камень Христос, Иже сокруши ныне идола безбожных мудровании,
молимтися, Госпоже всемощная.
Катавасия.
Седален, глас 2.
Се чудо дивное, яко в мразней северней стране
израстоша прекраснии цветы райстии, великии соньм мученик и
исповедник, иже украсиша вертоград Церкви Христовы, и спасают
нас молитвами своими.
Слава, и ныне.
Богородичен. Вси вернии прибегают под кров Твой
от всех бед и напастей, Богородице, имаши бо дерзновение к Сыну
Своему Христу Богу, Его же моли избавити страну нашу от
междоусобныя брани, и от всякаго зла, да вси в мире и любви
славят имя Твое Пресвятое.
Песнь 4, ирмос.
Услышах слух Твой и убояхся, разумех дела Твоя и
дивихся, Господи.
Запев.
Услышаша Господи соловецтии отцы, яко приидоша
гонители принудити их отврещися веры правыя, удивишася, и
затвориша врата обители, вопиюще Ти: слава силе Твоей.
Запев.
Оружием и убийством вводяху инославнии яко
триперстие, тако и прочия пагубныя новины, предавая противящихся
мукам и смерти, но преподобнии не убояшася их.
Слава.
Безбоязненно сретоша святии врагов Креста
Христова, внезапу вринувшихся во обитель, еже искоренити
Православие, и от них пострадаша.
И ныне.
Богородичен. Стамна злата Ты еси Пречистая,
приемши бо Манну небесную Христа, дарова мирови Хлеб жизни,
Егоже причащающеся, жизни вечныя сподобляемся.
Катавасия.
Песнь 5, ирмос.
Божиим светом Ти Блаже утреннюющих Ти душа
любовию просвети, молюся Тя ведети Слово Божие, истиннаго Бога
от мрака греховнаго изимающа.
Запев.
Исправляя свое падение в вере, игумен Никанор
утвержаше братию непоколебимым быти в вере истинней, за ню же и
сам пострада до смерти.
Запев.
Растленныя книги не повинустеся прияти,
преподобнии, и царь посла вои своя, иже по взятии обители
предаша вас мукам ужасным, в нихже и скончастеся.
Слава.
За нозе привязавше многих святых ко хвостам
конским, мучители влачаху их, дондеже предаша душа своя в руце
Божии.
И ныне.
Богородичен. Дщерь праматери Еввы,
Пренепорочная, Ты исправила еси тоя падение, рождьши Христа,
истребившаго рукописание прародительнаго греха.
Катавасия.
Песнь 6, ирмос.
Житейскаго моря воздвизаема зря напастей бурею,
в тихо пристанище притек, вопию Ти, возведи от тли живот мой,
Многомилостиве.
Запев.
Почтем вернии всех святых мученик соловецких,
пострадавших за Церковь Божию, яко во обители, тако и вне ея, да
молятся о душах наших.
Запев.
Да прославится с мужественным Никанором Макарий
и Хрисанф древорезец, и Феодор со Андреем и Димитрием, и вси
мученически скончавшиися Царствия ради Небеснаго.
Слава.
Вси воеводы ратовавшии на святую обитель, судом
Божиим казними быша со еретическим архимандритом Иосифом,
страстотерпцы же водворяются в райских чертозех.
И ныне.
Богородичен. Яко на облаце легце прииде Спасе,
носим Приснодевою, от Нея же плоть безгрешну приял еси, да
человеки от греха спасеши.
Катавасия.
Слава, и ныне.
Кондак, глас 7.
Божественною силою укрепляем, всемощныи полк
соловецких исповедник победи силу вражию терпением лютых мук,
ими же уморени бывше святии, достойно ныне ублажаются славою
нетленною, мы же святую память их торжествуем светло.
Икос.
Неповинустеся святии беззаконному повелению
цареву, и иерархом отпадшим, еже отврещися апостольских
преданий, аще обстоими бысте воинством. Того ради подвергоша вас
мукам нестерпимым, и смертем многообразным, Господь же прослави
вас пречудным знамением, непогребени бо лежаша многое время
телеса ваша, пребываху нетленни и неповрежденни, яко истинных
угодник Божиих, тем святую вашу память торжествуем светло.
Устав чтения Евангелия смотри на странице
90.
Прокимен. Честна пред Господем смерть
преподобных Его.
Стих: Что воздам
Господеви о всех их же воздаст ми.
Евангелие от Матфея, зач. 38.
Рече Господь Своим учеником, всяк убо иже
исповесть Мя пред человеки, исповем его и Аз пред Отцем Моим,
Иже на небесех. А иже отвержется Мене пред человеки, отвергуся
его и Аз пред Отцем Моим, Иже на небесех. Не мните, яко приидох
воврещи мир на землю. Не приидох бо воврещи мир, но мечь.
Приидох бо разлучити человека на отца своего, и дщерь на матерь
свою, и невесту на свекровь свою. И врази человеку домашнии его.
Стихера, глас 5.
Преподобнии отцы соловецтии, пострадаша за
отеческое благочестие доблественне, архимандрита бо Никанора,
инока Макария, и иных мнозех, мучители мразом лютым умориша,
Хрисанфу же Феодору и Андрею руце отсекоша, овых повесиша за
выи, инех же за нозе, и инех мечми посекоша, и в темницах
истомиша, и инако умертвиша, и тако мученицы предаша душа своя
Богу, Егоже возлюбиша.
Песнь 7, ирмос.
Неизреченное чудо, Иже в пещи избавивыи
преподобныя отроки из пламени, во гробе нове бездушен полагается
на спасение нам, поющим, Избавителю Боже благословен еси.
Запев.
Неизреченное чудо совершися, царь бо повелевыи
взяти святую обитель, недугом томим лютым, разуме, яко за сие от
Бога казним, посла свободити ю, но уже позде бысть.
Запев.
Не токмо здравых, но и немощных истяза мучитель, и
яко не покоришася отврещися веры Христовы, связа их по двое, и
за нозе влачивше, оставиша на леде, на немже и замерзоша.
Слава.
Воевода Мещеринов, взявыи Соловецкую обитель, и
избивыи иноки и бельцы, изволением Божиим прия казнь от своих
си, яко хищник неправедныи.
И ныне.
Богородичен. Несть никтоже, иже согреши якоже
аз, но надеяся на Твое всемогущее предстательство, Владычице, не
отчаяваюся своего спасения.
Катавасия.
Песнь 8, ирмос.
Ужаснися бояися небо, и да подвижатся основания
земли, се убо в мертвецех вменяется Иже в вышних, Живыи и во
гробе мале обитовает, Егоже дети благословите, священнии пойте и
превозносите Его во веки.
Запев.
Ужаснися и убойся небо, яко избиша святых вящши
четырех сот во обители Соловецтей, мнящиися быти православнии,
делы же еретицы.
Запев.
Избиеннии от своих единоплеменник святии,
молитеся Господеви, да сохранит нас от междоусобныя брани, и от
всякия вражды и свары, любовию исполняя вся.
Слава.
Врата адова ополчишася одолети Церковь
Христову, но страстотерпцы мечем веры, и силою крестною
низложиша вся ухищрения их.
И ныне.
Богородичен.Не изменься Божеством Бог Слово,
соделася Человеком по естеству, воплощься от Тебе,
Пренепорочная, да человека соделает богом по благодати.
Катавасия.
Песнь 9, ирмос.
Странствия Владычня и безсмертней трапезе на
горнем месте высокими умы вернии приидите, восприимем возшедша
Слова, от Слова научьшеся, Егоже величаем.
Запев (поклон).
Препоясавше чресла своя
истиною и оболкшася во броня правды, победисте противных
кротостию и терпением мук смертоубийственных, тем же вас
величаем.
Запев.
Исцеления обильно источаете всем призывающим
вас с верою и любовию исповедницы, сего ради вас присно
величаем.
Слава.
Умножистеся яко кедри, иже в Ливане, святии
мученицы, вашими бо учении и подвиги возрастоша тмы верующих,
иже вас любовию величают.
И ныне.
Богородичен. Ангели, архангели, вся силы
небесныя славословят Твое безмужное Рожество Богородице, имже
спасла еси человечество от горькаго мучительства адова.
Катавасия.
Задостойник (стр.87): Владычице, приими молитву
раб Своих… (поклон до земли).
Трисвятое, и по Отче наш, Исусова молитва.
Тропарь преподобномученикам
(Наздани на основании...),
Слава, кондак им (Божественною
силою...), и ныне.
Богородичен (Гавриилу
провещавшу Ти Дево...).
Господи помилуй (40 раз, с
тремя поклонами в начале).
Слава, и ныне.
Честнейшую херувим... (поклон).
Слава (поклон),
и
ныне (поклон). Господи
помилуй
(дважды), Господи благослови
(поклон).
Отпуст.
Господи
Исусе Христе, Сыне Божии, молитв ради Пречистыя Ти Матере и
святых преподобномученик и исповедник, иже в Соловецтей обители
за древлее благочестие избиенных, и всех святых, помилуй и спаси
нас, яко Благ и Человеколюбец. Аминь.
Господи помилуй (трижды), и
исходные поклоны.
<<
назад на "БОГОСЛУЖЕНИЕ"