Канон празднику Преполовения

Тропарь, глас 8

Преполовившуся празднику, жаждущую душу мою благочестия напой воды, яко всем, Спасе, возопил еси, жаждай дя грядет ко Мне и да пиет. Источниче жизни, Христе Боже, слава Тебе.

КАНОН, глас 4-й

Песнь 1.

Ирмос. Моря Чермнаго пучину, немокрыми стопами древле шествовав Израиль, крестообразно Моисеовыма рукама, Амаликову силу в пустыни победил есть.

Запев: Слава Тебе Боже наш, слава Тебе (поклон).

Велия яже паче ума, Твоего Владыко божественаю воплощения благодеяния сияют нам, дарове же и благодати, и божественыя светлости, благоподатно истекают.

Запев.

Пришел еси Христе, светлости Божества испущая, праздника посреди явленно: праздник бо радостен спасаемым еси, и спасения нашею ходатай.

Слава.

Премудрость и правда, Господи, и избавление, от Бога Ты бысть нам, и от земли к небесней приводя высоте, и Дух Божественыи даруя.

И ныне.

Плоть Твоя истления во гробе не виде Владыко, яко составися кроме семене, тления не прият исследованием естества, пресуществене, не работавши.

Катавасия: Сохрани от бед рабы Своя Милосгиве, яко усердно к Тебе прибегаем, к милостивому Избавителю и всех Владыце Господу Исусу (поклон).

Господи помилуй (трижды с поклонами).

Песнь 3.

Ирмос. Веселится о Тебе церкви Твоя Христе зовущи, Ты ми крепость Господи, прибежище и утвержение.

Запев.

Вод животворных, церкви источник огверзл еси, аще кто жаждет, усердно да приходит и пиет, вопия Блаже.

Запев. (Повторяем стих).

Слава.

От земли убо, на небо вознестися, проявление глаголаше, с небесе же Духа послати обетова Святаго.

И ныне.

Богородичен. Иже естеством животворивыи, иже от Девы родивыися Господь, всем верным дарует безсмертие, яко Благоутробен.

Катавасия.

Слава, и ныне.

Седален, глас 8-й.

Стоя посреди светилища, преполовляющуся божествене празднику, жаждай взываше, да грядет ко Мне и пиет, пияи бо от сея Божественыя Моея воды, реки из чрева источит повелении Моих. Яко иже верует в Мя, посланнаго от Божественаго Родителя, со Мною прославится. Сего ради вопием Ти, слава Тебе Христе Боже, яко богатно излиял еси воды Твоего человеколюбия рабом Своим.

Песнь 4.

Ирмос. Воздвижена Тя видевши церкви на кресте, Солнца Праведнаго, ста в чину Своем, достойно взывающи, слава силе Твоей Господи.

Запев.

Растерзав смерти врата Своею силою, пути жизни сказал еси, и безсмертия двери отверзл еси, иже верою Тебе зовущим, слава силе Твоей Господи.

Запев.

Преполовение всех и конец имея, и начало яко Безначален обдержа, стал еси посреди вопия, божественных, богомудрии, даров насладитеся.

Слава.

Яко Бог всех держа власть, яко силен державу низложив смерти, послати обеща Христе Дух Святыи, иже от Отца происходящий.

И ныне.

Богородичен. Даеши богатно благодать Тебе поющим, и иже из Тебе Рождьшагося Превечнаго Слова, Мати неискусомужная, и согрешением оставление, сим просящи Пречистая.

Катавасия.

Песнь 5.

Ирмос. Ты Господи ми свет, в мiр пришел еси, во свет святых обращая, из мрачна неведения, верою хвалящих Тя.

Запев.

Божественых праздник преполовение достигше, совершеное божественыя добродетели постигнути, потщимся богомудрии.

Запев. (Повторяем стих).

Слава.

Яко воистину священно, настоящее торжество, преполовение бо великих праздник, повелевает и светится обоюду.

И ныне.

Богородичен. Ум ангельский не может разумети Твое не изреченное из Девы, и пречистое Рожество, Спасе мой Всесилне.

Катавасия.

Песнь 6.

Ирмос. Пожру Ти со гласом хваления Господи, церкви вопиет Ти, от бесовския крове очищшися, милостию от ребр истекшею Ти кровию.

Запев.

Преполовение пятьдесятницы наста днесь: отсюду божественая убо Пасха, святая светится, просвещающи божественейшею светлостию, от онуду же Утешителевою благодатию осиявающи.

Запев. (Повторяем стих).

Слава.

Глаголаше в церкви Христе предстоя, июдейским собором Свою славу открывая, и предъявляя сродство к Родителю.

И ныне.

Богородичен. Буди ми Предстательница, и Стена нерушимая, от мiрских мя соблазн избавляющи, едина Богородительнице, и божественым светолитием освещающи.

Катавасия.

Слава, и ныне.

Кондак, глас 4-й.

Празднику законному преполовившуся, всяческих Творец и Владыка, к предстоящим глаголаше Христе Боже: приидите и почерпите воду безсмертия. Тем же Ти припадаем и верно вопием, щедроты Твоя даруй нам. Ты бо еси источник животу нашему.

Икос. Олядевшую ми душу согрешенми и беззаконии, кропленьми Твоих кровей напой, и покажи плодоносну добродетельми. Ты бо рече всем приходящим к Тебе, слово Божие пречистое, воду нетления почерпите, живу же и очищающую грехи, поющим славное и божественое Твое востание, подая Благии иже с высоты сошедшую воистину учеником Твоим Духа крепость, Тебе Бога ведящим, Ты бо еси источник животу нашему.

Песнь 7.

Ирмос. В пещи Авраамския дети персьстей, любовию благоверия паче, нежели пламенем опаляеми взываху, благословен еси в церкви славы Твоей Господи.

Запев.

Крепость Спасе смертную разорь силою, стези жизни показал еси человеком, благодарно Тебе зовущим, благословен еси в церкви славы Твоей Господи.

Запев. (Повторяем стих).

Слава. Плоть носяща видяще, не разумеша собори еврейстии слова Тебе Божия. Но мы Тебе воспеваем, благословен еси в церкви славы Твоея Господи.

И ныне.

Богородичен. Вышняго освященно Божие селение, радуйся. Тобою бо дадеся радость Богородице, вопиющим Ти, благословена Ты в женах, всенепорочная Владычице.

Катавасия.

Песнь 8.

Ирмос. Руце распростер Даниил, львова зияния в рове затче: огненую же силу угасиша, добродетелию преноясавшеся, иже благочестия любителие отроцы взывающе, благословите вся дела Господня Господа.

Запев.

Красен из гроба востав, Своею Божества славою сияя, апостолом Своим Господи явил еси Духа обещание, тем посылая действо, благословите вся дела Господня Господа.

Запев.

Умертвив ада яко Бог, Живоначальниче, всем источил еси живот вечный. Его же ныне воображают светлейше, светоносных дней сих, радостно вопиющим, благословите вся дела Господня Господа.

Слава.

Яко солнце Христе правде явися, заря мiру послал еси апостолы Своя, носяща Тебе света безсеменнаго, и неразумия мглу очищающа, вопиющим, благословите вся дела Господня Господа.

И ныне.

Богородичен. Се ныне оскуде яве, от июдина племене князь и вождь: Ты бо Всененорочная родила еси, преже обещавшаго обетования, иже Христа Бога поющим, благословите вся дела Господня Господа.

Катавасия.

Песнь 9.

Ирмос. Камень нерукосечныя горы, от несекомыя Тя Девицы, краеугольный отсечеся Христос, и совокупив разстоящаяся естества: тем веселящеся, Тя Богородице величаем.

Запев с поклоном.

Новому и чистому житию, от Христа научившеся, сие даже до конца сохранит, полезно вси потщимся, яко да Свягаго Духа пришествие приимем.

Запев.

В небесное паки житие звани бывши, ходатайственою силою, излиявшагося даже до рабия образа, и нас вознесшаю, Сего достойно величаем.

Слава.

Ты мое смертное Живодавче, обложением безсмертия, и нетления благодатию оболк Спасе, воскресил сей, и Отцу привел сей, временную ми разрушив брань.

И ныне.

Богородичен. Яко корень источника, и вину нетления, Тебе Дево вси вернии уведевше, похвалами почитаем. Ты бо составное бсзсмертие источила еси.

Катавасия.

Задостойник: Чюже есть матерем Девою быти, и странно девам дети раждати: на Тебе Богородице обое смотрение бысть, тем Тя вся племена земная, непрестанно величаем.
(Поклон до земли).

Отпуст: В преполовение праздника пятьдесятницы, вшедыи в церковь, и учивыи фарисеи и саддукеи, Господи Исусе Христе, Сыне Божий, молитв ради пречистыя Твоея Матере, и всех святых, помилуй и спаси нас, яко Благ и Человеколюбец. Аминь.

Господи помилуй (трижды).

Исходные поклоны.

 

<< назад на "БОГОСЛУЖЕНИЕ"