КАНОН ПРЕПОДОБНОМУЧЕНИЦЕ И ИСПОВЕДНИЦЕ ФЕОДОРЕ
(память ея 11 сентября)
Тропарь, глас 5.
Многоскорбную пучину мученических подвиг добре
преплывше, достигла еси в небесное царствие, исповеднице
божественная Феодоро, молися о нас Господеви, да не будем
потоплены душетленными волнами грехов и беззаконий, но да
сподобимся жизни вечныя со святыми (дважды).
Слава, и ныне.
Богородичен. Радуися Двери Господня
непроходимая, радуися Стено и Покрове прибегающим к Тебе,
радуися Заветреннее Пристанище, Неискусобрачная, рождьшая плотию
Творца Своего и Бога, молящи не презри о воспевающих и
кланяющихся Рожеству Твоему
(поклон).
Канон, имый краегранесие: святую Феодору чту с любовию. Глас 7.
Песнь 1, ирмос.
Манием
Ти на земен образ преложися первие разливаемое водное естество
Господи, темже немокренно шествовав Израиль, поет Тебе песнь
победную.
Запев: Святая
преподобномученице и исповеднице Феодоро, моли Бога о нас
(поклон).
Святую Феодосию
восхвалити по достоянию не возмогаю недостойный аз, но Ты,
Христе, подаждь ми Свою всемогущую благодать молитвами ея.
Запев.
Всею душею и всею мыслию возлюбила еси Христа
Бога, и служаше Ему вся дни живота своего верою и добродетельми.
Слава.
Яко ревностная исполнительница Евангелия, нищих
миловаше, странных приимаше, и всем требующим помощи служаше,
Феодосие любвеобильная.
И ныне.
Богородичен. Евву прельсти искуситель снедию
краснаго плода, и нас ныне обольщает, Тобою избавляемся
искушении его Владычице всепетая и неискусобрачная.
Катавасия: Избави от бед
рабы своя, святая преподобномученице и исповеднице Феодоро, яко
вси по Бозе к тебе прибегаем, ты бо молиши о нас Христа Бога
нашего
(поклон).
Господи помилуй (трижды, с
поклонами).
Песнь 3, ирмос.
В начатце небеса всесильным словом Си утвержеи
Господи Спасе и всетворящим Духом Божиим, всю силу их на
недвижимом камени исповедания Твоего утверди.
Запев.
Твердо исполняя заповеди Божии, Феодосие, всех
наставляше пребыти в вере православней, и творити дела добрая
нелицемерно.
Запев.
Уметы вменила еси благородие рода, и богатство,
и честь, прияв ангельскии образ, и наречена Феодорою, в нем же и
поживе богоугодно.
Слава.
Юности взыграния умертвила еси воздержанием,
молитвою и богомыслием, и явися избранный сосуд благодати Божия,
Феодоро преподобная.
И ныне.
Богородичен. Твоим вседержавным Покровом
сохраняемся от бури вражиих нападании, Владычице Пресвятая,
християном верное прибежище.
Катавасия.
Седален, глас 5.
За лишение богатства гибнущаго получи Царствие
Небесное, блаженная, за поругание временное восприя славу
вечную, за смрадную темницу наслаждаешися неизреченною
светлостию и благоуханием, и молишися Христови, спастися всем,
верно торжествующим святую память твою.
Слава, и ныне.
Богородичен. Погружаем треволнении страстей
лютых, прибегаю к Тебе Пречистая, воздвигни мя от них вскоре, и
спаси мя от всякаго навета лукаваго, и порази борющих мя силою
от Тебе Рожденнаго.
Песнь 4, ирмос.
Отча недра не оставль, и сошед на землю Христе
Боже, тайну услышав смотрения Твоего и прославих Тя
Человеколюбче.
Запев.
Феодору преблаженную чту с любовию и
благоговением, яко святую и преподобную, яко мученицу и
исповедницу, яко великую угодницу Божию, и молитвенницу о душах
наших.
Запев.
Еретицы, не терпяще твоея ревности и любви к
Богу, нощию емше тя, сковаша узами железными, и вринуша в
подклеть на томление.
Слава.
Отречеся преподобная прияти обычаи, Православию
противнии, и ввергоша ю мучители в темницу, идеже досаждения и
беды терпяше, поя Богови, прославляя Тя, Человеколюбче.
И ныне.
Богородичен. Невместимыи небесы во чрево Твое,
Присно Дево, вместися неведомым образом, и родися неизреченно,
спасая мир от работы вражия.
Катавасия.
Песнь 5, ирмос.
Нощь не светла неверным, верным же просвещение
в пищи словес Твоих, и сего ради к Тебе утреннюю, и воспеваю
Твое Божество.
Запев.
Делы показала еси, яко пребываеши в Церкви
истинней, сподобившись и во узах причаститися тела и крови
Христовы от благочестиваго священноинока Иова.
Запев.
О болезни сына своего единороднаго вельми
скорбя, не предпочла еси его Христу, якоже жадаху противницы,
взываше бо со Иовом, Господь даде, Господь и отъя.
Слава.
Разреши неплодие супружества, и сохрани здравие
младенцем, своими предстательствы пред Богом, молимтися, Феодоро
великоименитая.
И ныне.
Богородичен. Тобою потребися клятва и умертвися
смерть, Тобою благословение процвете, и жизнь мирови даровася,
Богородице Марие, рождьшая Спаса всем.
Катавасия.
Песнь 6, ирмос.
Плавающаго в молве житейских суетий, и с
кораблем потопляема грехи, и душетленну зверю приметаема, яко
Иона, Христе, вопию Ти: от смертныя глубины возведи мя.
Запев.
Увещаху тя еретичестии пастырие, соединитися с
ними в вере, ты же препрела их Писании Священными, Феодоро
премудрая.
Запев.
Человецы свирепии тако яростно влечаху тя с
увещания за цепь железную, ею же бе окована выя твоя, яко глава
твоя бияшеся о ступени до крове.
Слава.
Тебе ругающеся суемудреннии, возяху тя на
дровнях по стогнам градским, но ты и зде исповедаше древлее
Православие истинным крестным знамением.
И ныне.
Богородичен. Не лиши нас грешных Твоея помощи и
заступления, не имамы бо вернии, иныя надежды и прибежища по
Бозе, разве Тебе, Владычице.
Катавасия.
Слава, и ныне.
Кондак, глас 1, подобен Лик ангельскии.
Благочестно проходя путь
жизни, прияла еси иноческий образ, в нем же Богу угоди, и люди
утверди в вере истинней, преподобномученице Феодоро прехвальная,
с пострадавшими с тобою благородными женами, молися Господеви,
подати нам велию милость.
Икос.
Возсия днесь светоносная память твоя,
великоименитая исповеднице Феодоро, пострадавшая от рук
беззаконных, и победившая полки бесовские терпением мук,
изгнанием в заточение и кончиною мученическою от глада, тем же
славим Христа Бога, твоими молитвами подающаго нам велию
милость.
Песнь 7, ирмос.
Иже в пещь огненную ввержени преподобнии
отроцы, и огнь на хлад преложиша воспеванием, сице пояху:
благословен еси Господи Боже отец наших.
Запев.
Ужасно бе зрети, егда преподобную Феодору
подъяша на дыбу, и ломахуся составы ея, растягахуся жилы и кожа,
она же взываше: благословен Бог отец наших.
Запев.
Сослаша тя мучители во град Боровск, идеже
вринуша в подземную темницу, и томяху мразом, гладом и жаждею,
ты же глаголаше: благословен Бог наш, изволивыи тако.
Слава.
Лютыя муки претерпевшая великая в женах
Феодоро, исцеляеши болезни естества женскаго своими молитвами,
тем тя благодарно воспеваем.
И ныне.
Богородичен. От сосцу питавыися Матере Своея,
яко младенец, Исусе Христе, сохрани от болезней младенцев, и
спаси их молитвами рождьшей Тя.
Катавасия.
Песнь 8, ирмос.
Неопальна огнем в Синаи причащьшися Купина,
Бога показа, медленноязычну и гугниву Моисеови, дети рвением
Божиим вметаемыя во огнь певцы, показа вся дела Господня,
Господа пойте и превозносите Его во веки.
Запев.
Юдуже ни свет, ни глас, ни воздух не проницаше,
во оной смрадней темнице, тлею исполненней, гладом томима,
мученически скончалася еси.
Запев.
Боровску граду похвала еси и покров, и
заступление, исповеднице Феодоро, в нем бо предала еси душу свою
в руце Божии, и на небесех молишися о всем мире.
Слава.
О тебе хвалится земля русская, тобою украшается
Церковь Божия, в ней бо ты процвете, яко цвет благоуханныи, и
просия, яко камень многоценныи.
И ныне.
Богородичен. Возгрей в сердцах наших любовь
нелицемерную ко всем человеком, и истреби ненависть от людей, да
сподобимся вси Царствия Небеснаго Твоим ходатайством, Богомати.
Катавасия.
Песнь 9, ирмос.
Выше естества Матерь, и по естеству Деву, едину
в женах благословенную, песньми вернии Богородицу величаем.
Запев (поклон).
В Церкви воинствующей
мученически пострадала еси, в Церкви торжествующей ныне
водворяешися со ангельскими чинми, яко исповедница
достохвальная.
Запев.
Избави преподобномученице страну нашу от
междоусобныя брани и от всякаго зла, развевая мрак безбожия и
беззакония, и водворяя мир и тишину молитвами своими.
Слава.
Юже получила еси радость неизглаголанную на
небесех, тоя сподоби и мене многогрешнаго, сию убогую песнь тебе
воспевшаго, Феодоро преименитая.
И ныне.
Богородичен. Седяи на херувимех престол Себе
Твое чрево содела Богородице, темже явилася еси вышши херувим, и
всех сил небесных.
Катавасия.
Задостойник (стр.87): Владычице,
приими молитву раб Своих (поклон до земли).
Трисвятое, и по Отче наш, Исусова молитва.
Тропарь преподобномученице (Многоскорбную
пучину...).
Слава, кондак ей (Благочестно
проходя...), и ныне.
Богородичен: (Радуися
Двери Господня...).
Господи помилуй (40
раз, с тремя поклонами в начале).
Слава, и ныне.
Честнейшую херувим... (поклон).
Слава (поклон).
И
ныне (поклон). Господи
помилуй
(дважды), Господи благослови
(поклон).
Отпуст.
Господи
Исусе Христе, Сыне Божии, молитв ради Пречистыя Ти Матере и
святыя преподобномученицы и исповедницы Феодосии, нареченныя во
инокинех Феодоры, яже в Боровске пострадавшия, и всех святых,
помилуй и спаси нас, яко Благ и Человеколюбец.
Аминь.
Господи помилуй (трижды), и
исходные поклоны.
<<
назад на "БОГОСЛУЖЕНИЕ"