Канон недели антипасхи (недели Фоминой)

В неделю Антипасхи, яже о Фоме.

Тропарь: глас 7:

Знаменану гробу, Живот от гроба восиял еси Христе Боже. И дверем затвореным, учеником предста, Иже всех Воскресение. Дух Правый теми обновляя нам по велицей Твоей милости.

Канон, творение Иоанна мниха.

Глас 1.
Песнь 1.

Ирмос: Поем вси людие, от люты работы фараони, люди изменьшему, и во глубине морьстей, ногами немокрыми наставльшему, песнь победную, яко прославися.

Запев: Слава Тебе, Боже наш, слава Тебе.

Днесь просвещение душам, Христос бо от гроба, якоже солнце восияв тридневно, мрачную бурю отгнал есть греха нашего. Того воспоем, яко прославися.
Царь временом светоносныи день, днем же царски явлься, дары нося украшает избранныя люди церковныя, непрестанно поющыя воскресшаго Христа, яко прославися.
Ни двери смертныя Христе, ни печати гробныя, ни ключи вратныя Тебе противишася. Но воскрес предстал еси другом Си Владыко мир даруя, всяк ум преимущии.

Песнь 3.

Ирмос: Утверди мене Христе, на недвижимом камени заповедей Твоих, и просвети мя светом лица Твоего. Несть бо свята паче Тебе Человеколюбче.
Новыя за ветхих, и в тленных место нетленная, Крестом Си Христе совершил еси. Нам во обновление жизни ходити достойно повелел еси.
Во гробе затворен со описанною плотию Своею, неописанныи Христе, воскресл еси, и дверем затворенным предстал еси Своим учеником Всесилне.
Язвы Своя Христе, яже волею приял еси нас ради, предстал еси учеником Своим сохрань свидетельство Свое, и показал еси славу Воскресения.

Седален, глас 6:

Яко посреди ученик Своих прииде Спасе, мир дая им, прииди и к нам и спаси нас.

Слава, и ныне

Богородичен: Иже благословеную нарекии Матерь Себе, прииде на страсть волею Своею, просияв на кресте, взыскати хотя Адама, глаголя ангелом: срадуйте Ми ся, яко обретох изгибшую драхму. Иже вся мудре устроивыи Боже наш Слава Тебе.

Песнь 4.

Ирмос: Велия тайна Твоего Христе смотрения. Сие убо свыше предзря, прозорливыма очима Аввакум, изыде вопияше Ти на спасение людей Твоих Человеколюбче.
Желчь убо вкусив, древнее вкушение исцеляя. Ныне же сострадовным медом, просвещение даде Христос праотцу, и Своего сладкаго Причастия.
Богатство почерп от сокровища некрадомаго Божественаго Благодателю, копием бо прободеная Ти ребра испытав, премудрости и разума наполняет мiра близнец.
Рукою испытати Человеколюбче прежде всех повелеваеши Фоме, простирая не верующу ребра, мiрови уверяя Свое Христе тридневное Востание.
Твой всеблаженныи хвалимь есть язык, о близнече, первее убо благочестно проповеда Живодавца Исуса, Бога же и Господа, и от дуновения и прикосновения исполнися благодати.

Песнь 5.

Ирмос: От нощи утренююще хвалим Тя Христе Боже, со Отцем Собезначальна, и Спаса душам нашым, мир мiрови подаждь, Человеколюбче.
Представ Спас другом скорбящым, и пришествием всю отъемля скорбь, и играти воздвизает Своим Воскресением.
О истинному похваляемому, Фомину страшному начинанию, дерзостне бо осяза ребра, Божественным огнем блистающая.
Неверие Фомино, вере родително нам показал еси, Ты бо мудростию Своею промышляеши полезное Христе яко Человеколюбец.

Песнь 6.

Ирмос: Пророка спасл еси от кита Человеколюбце, и мене из глубины греховныя возведи, молю Ти ся.
Фомы не оставил еси Владыко, погружаема глубиною неверия, длани простер на испытание.
Спас наш глаголаше: осязавше мя видите кости и плоть носяща, Аз не пременихся.
Ребра осязав не веровавыи Фома, не сущу ему в первыи вход Твой Человеколюбче, Спасе наш.

Кондак, глас 8.

Любопытною десницею, жизноподателная Твоя ребра Фома испытал есть Христе Боже. Затворенным бо дверем яко вниде, с прочими апостолы вопияше, Господь еси и Бог мой.

Икос: Кто сохрани ученичу длань тогда не опалиму, егда ко огненым ребром приступи Господним? Кто даде ей дерзость, и возможе осязати пламенную кость, всеми неосязаемую? Аще бо не бы ребро силу подало бренней деснице, како имяше осязати, страстию Поколебавшаго вышния и нижния. Сия благодать Фоме дадеся, еже сия осязати, Христови же вопити: Господь еси и Бог мой.

Песнь 7.

Ирмос: Телу служити мусикийскому согласию созывающу люди: от песней Сионских поюще отечески отроцы Давыдовы. Мучителево разориша злочестивое веление, и пламень в росу преложше, песнь воспевающе, превозносимыи отцем Бог благословен еси.
Яко первыи есть днем и началныи, светоносныи сей, воньже радоватися достойно, новым и божественым людем с трепетом. Приносит бо века образ, яко осмицы совершая будущаго. Воньже воспеваем, превозносимыи отцем Бог благословен еси.
Един дерзнувыи, и неверною верою облагодатив нас Фома близнец, решит убо мрачное неведение всем концем верным неверием. Себе же венец плетет яве, глаголя, Ты еси Господь, превозносимыи отцем Бог, благословен еси.
Не туне усумневся Фома, востание Твое не видев, но верно явьственно тщашеся показати то Христе, всем языком. Тем же убо неверием увери всех, и научи глаголати Тебе, Господь превозносимыи отцем Бог, благословен еси.
Со страхом руку Фома, в ребра Твоя живоносная, Христе, внутрь с трепетом положи, и действом Спасе сугубым, обою естествому, иже в Тебе совокупленою несмесно уверяяся, и верою взываше глаголя, Ты еси Господь превозносимыи отцем Бог, благословен еси.

Песнь 8.

Ирмос: В пламени огнене горящия пещи, Сохраньшаго дети, и во образе ангела Снизшедшаго к ним, пойте Господа и превозносите Его во веки.
Возжелев Твоего радостнаго видения, прежде не веровавыи Фома, сподобль же ся того, Бога и Господа Тя нарицаше Владыко. Егоже превозносим во веки.
Укрепльшаго Фомино неверие, и показавшаго ребра, и того дланию осязаема, пойте Господа, и превозносите Его во веки.
Твое тайное сокровеное сокровище, нам отверзе Фома. Богословит бо языком богоносным, пойте Господа глаголаше, и превозносите Его во веки.

Песнь 9.

Ирмос: Тебе светлую свещу, и Матерь Света, всекоренную Славу, и вышьшую всех тварей, песньми величаем.
В Твой светлыи день и пресветлыи Христе, в всесветлей благодати, в нейже красен добротою учеником Си предста, в песнех величаем.
Твоя бренною дланию осязаема ребра, и не опаливша сию огнем невещественаго Божественаго существа, в песнех величаем.
Тя иже яко Бога из гроба восиявшаго Христа, не очима видевше, но сердечною любовию веровавше, песньми величаем.

Задостойник, тойже ирмос.

Отпуст:
Вшедыи ко учеником дверем затвореным, и Фому уверивыи, Господи Исусе Христе Сыне Божий, молитв ради Пречистыя Ти Матере, святых славных и всехвалных апостол и всех святых, полмилуй и спаси нас яко Благ и Человколюбец.

Аминь.

 

<< назад на "БОГОСЛУЖЕНИЕ"