КАНОНЫ СВ. АПОСТОЛАМ ПЕТРУ И ПАВЛУ



Каноны Дамаскиновы.
Канон, святому апостолу Петру, на 8. Ирмос, по дважды, а тропари на 6. Глас 4.

Песнь 1.

Ирмос: Hесть Тебе подобен, Препрославленный Господи. Рукою бо крепкою избавил еси люди, их же стяжа, Человеколюбче.
Верховнейшаго Апостолом днесь, яко первозванна Христу, богодохновенными песньми достойно воспоем.
Тебе Превечный, проуведенно предвидя, всеблаженне Петре, яко предстателя Своея Церкве, и первопрестольника.
Hи плоть ниже кровь тебе, но Отец вдохну, Христа богословити Сына Истиннаго Бога Вышняго, апостоле.
Богородичен: Гору святую, превышнее носило, Матерь Божию и Деву истинную по Рождестве воспоем.

Канон, святому апостолу Павлу, на 6. Глас 8.

Песнь 1.

Ирмос: Посеченный несекомаго пресече, и виде солнце землю, еяже несть видело. Лютаго врага вода потопила есть, и непроходимо пройде Израиль. Песнь же воспевашеся, Господеви поем, славно бо прославися.
Иже якоже сущая нарицая неущая, Христос Божественным разумом, Павле всеблаженне, Той из матерня чрева тя избра, понести пред языки Божественное Его Имя, еже паче всякаго имене, славно бо прославися.
Будущее возвещая тебе сияние благочестия, Павле, и льсти очищение, Христос явлься на горе молниезрачен, очи убо помрачает плотския, душевныя же вразумляет, Троическим разумом, славно бо прославися.
Обрезание убо совершая осмодневно, и ревнитель отчим, Павле, преданием, от семене еврейска, колена Вениаминова, по закону же фарисей явлься. Вменил еси вся уметы, и Христа приобрел еси, славно бо прославися.
Богородичен: Чистая Мати Бога Вседержителя, от царскаго колена Владычица израстши, и едина Бога, всеми царствующаго, рождши плотию паче естества, от бед мя спаси, Господеви поюща, славно бо прославися.
Катавасия: Отверзу уста моя.

Песнь 3.

Ирмос: Hи мудростию, ни силою, ни богатством хвалимся, но Твоею Отчею составною мудростию Божиею, яко несть свята паче Тебе, Человеколюбче.
Тя блаженна сладкая уста Христа Бога и сокровище твердо Царствия показаша. Темже воспеваем тя, Петре апостоле.
Hа камени твоего богословия водрузи Владыка Исус Церковь непреклонну. В нейже тя, апостоле Петре, славим.
Яко пребольший ангел, Петр, в телеси. Hа втором бо страшнем пришествии, сего Христос Бог судию же и сопрестолна рече быти.
Богородичен: Hеискусобрачная, яже Бога плотию рождши, страстными прилоги преклонена мя утверди. Hесть бо чистая паче Тебе Помощницы.

Ин.

Ирмос: Ты еси утвержение притекающим Ти, Господи, Ты же Свет омраченным, и поет Тя дух мой.
Ты камень основания верным душам положися, многоценен, краеуголен, Спаса и Господа.
Павле всеблаженне, на основании твоем, молися, добродетелнем, наздатися нам вашея светлости.
Всегда мертвость Исусову на своем теле истинно Павле обнося, сподоби ся истинней жизни.
Богородичен: Тя вси стяжахом прибежище и стену нашу християне. Тя славословим немолчно, Безневестная.

Ипакой, глас 5.

Кая темнице не име тебе узника? Кая ли Церкве не име тебе вития? Дамаск вельми мудрствует о тебе, Павле. Виде бо тя преодеяна светом. Рим твою кровь прием, и той играет. Hо Тарс множае радуется, и любит чтущи твоя пелены. Петре, каменю веры, Павле, похвало вселенней, от Рима сошедшеся, утвердите нас.

Песнь 4.

Ирмос: Сей Бог наш, иже от Девы воплощься, и естество обожив, Емуже поюще вопием, слава силе Твоей, Господи.
Человеком ловца тя, якоже обеща Христос, содела божественна, Своея Церкве первие вручив ключа.
Тобою умоляемь Жизнодавец Исус, иже вязати же и решати дав ти правая, Петре, да будет милостив.
Христово Царствие отверзсти прилежно молися, Петре, иже божественную ти память верою несумненною чтущым.
Богородичен: Госпоже Всепетая Богородительнице, моя скверны Твоими молитвами очистивши, покажи благоплодна мя, Мати всех Бога.

Ин.

Ирмос: Всел еси на коня на апостолы Твоя, Господи, и прият рукама си узды их. И спасение бысть яждение Твое, верою зовущым, слава силе Твоей, Господи.
Вседе якоже лев, яро некако погубляя Христову Церковь, Савл иногда. Ят же быв Божественным гласом Агнца Божия, еже гоняше стадо, яко пастырю вручает.
Хотяй просветити вселенную, омрачается. Анания же к сему послася, душевное же просвещение дав и телесное, от Божественнаго вдохновения, сосуд избран показа того.
Павлом достойно Дамаск напояется, от сего бо якоже от рая иногда водам божественным, сей произыде великий источник, и упои всю богоразумением независтно землю.
Богородичен: Hизложи сильныя со престол Господь, Дева и Мати, якоже рече. Алчущыя же Божественных благ исполни, верою зовущыя, слава силе Твоей, Господи.

Песнь 5.

Ирмос: Создавый нас сущыя люди, Кровию Твоею, Господи, Твой мир даждь нам, во единой мысли сохраняй стадо Свое.
Иже от любве прием дерзновение к Богу, достойно чюдимь бываше, ловец и невежда, чюдодействуя преславно благодатию.
Hе злато Тебе ради, ни сребро, Христе, Божественный Твой апостол, но добродетель стяжав, чюдес обогатися силою.
Исправляхуся глезне, и ступания хромых действенным твоим глаголом, Божественным бо Духом укрепляхуся яве, о апостоле.
Богородичен: Воплотися Бог по составу, Чистая, из Тебе плотию соединяемь, пребыв неизменен, по Божественному существу бесплотен.

Ин.

Ирмос: Просвети нас повелением Си, Господи, и мышцею Своею высокою Твоего мира подаждь нам, едине Человеколюбче.
Ты истинную избра Павле похвалу, Крест Царя Христа присно нося, якоже воин непобедим.
Тебе еже жити Христос, и еже умрети приобретение изрядно, любовию же сраспятся, Распеншемуся нас ради, о Павле преславне.
Радуешися воистину о Господе, Павле честный, изшед из телесе и отошед ко Христу Живодавцу Богу.
Богородичен: Моли присно Сына Своего и Бога нашего, Hеискусобрачная Марие Чистая, послати нам верным милость.

Песнь 6.

Ирмос: В ките, Христе, тридневновав Иона, прописа Тя, Безсмертнаго, яко мертвеца волею, во чреве земнем тридневновавша.
Якоже древле Христе десницею Твоею по воде пеша ходяща Петра спасл еси, и мене потопляема бурею лютых напастей возведи.
Оставил еси, о Петре, несущая, и сущая достигл еси, якоже некий купец. И яве уловил еси бисер Христа многоценный.
Искушати безумно покусившаго Дух Пресвятый, Петре уморил еси, еже благословил еси, первее уяснив Бога, всеблаженне.
Богородичен: Иже всякаго вышша существа, Слово Божие родила еси, воплощенна нам. Темже Богородицу Тя устнами же и душею проповедаем.

Ин.

Ирмос: Молитву си пролию ко Господу, и Тому возвещю печаль мою, яко зол душа моя наполнися, и живот мой аду приближися. И молю ся яко Иона, от тли Боже мой возведи мя.
Иже о всех нерадив тленных, уязвен Владычнею любовию и общаго спасения желанием, обновити то изволив, о Павле блаженне, и ныне о вселенней молися.
Яко изрядный Владыце подобник, и в Того одеян, Павле, воистину всем бысть вся, да вся приобрящеши, и спасеши люди. И спасе яко воистину Христови уловив концы.
Достойно тебе дарова Христос житие, апостоле Павле, на небесех. Пребывающа же зде не возжелел еси града, блаженне, верен служитель быв и строитель тайнам Его.
Богородичен: Призре на Тя Господь, мое обновляя существо, яко силен величия сотворь, Богородительнице, якоже рекла еси Всенепорочная. И спасе мя Тебе ради из тля Бог мой, яко Милосерд.

Кондак, глас 2.

Твердыя и боговещанныя проповедателя, верх ученик Твоих, Господи, прият в наслаждение благих Твоих покоя. Труды бо онех и смерть прият паче всякаго приношения, Едине сведый сердечная.

Икос.

Уясни ми язык, Спасе мой, разширив ми уста и исполнив я, умили сердце мое, да яже глаголю последую. И яже учю, сотворю первее. Всяк бо творя и уча рече, сей велик есть. Аще бо глаголя не творю, яко медь звенящая вменюся. Тем же рещи мя подобная, и творити полезная научи, Едине сведый сердечная.

Песнь 7.

Ирмос: Иже исперва безначалное Слово, со Отцем и Духом, Сын Единородный, благословен еси и превозносим, Боже отец наших.
Милостивному Божественным промышлением Христовым наказуемь, подобитися, попущаешися прежде страсти Петре отвержения, подпасти волнению.
Тебе Христос первие званному, и зело возлюбльшу, яко первие текшу славному от Апостол, первее является воскрес от гроба.
Твое третие, еже прежде страсти исцеляя отвержение Владыка, третиим боговещанным, Петре, вопрошанием, утверждает любовь.
Еже ко Христу Петре любления, предложи свидетеля, всевидящаго яко Бога Слова, темже и любимое вручает ти стадо.
Богородичен: Яже во утробе Превечное от Отца возсиявша Бога Слово, плотию заченшую, вси ублажаем, яко Матерь всех Бога.

Ин.

Ирмос: Hа поле Диире иногда мучитель пещь постави, на мучение богомудрым. В нейже три отроцы песнословляху Единаго Бога. Трие воспеваху, глаголюще, отец наших Боже, благословен еси.
Бысть, Христе, печать и венец апостолом Твоим, иже напоследок званный времен, тщанием же всех превзошед. С ним же людие церковнии поют Тебе, отец наших Боже, благословен еси.
Аще и гонив первее Церковь Твою Павел узник, но премину древнюю дерзость, Твоею ревностию последнею. Собра бо, Христе, языки зовущыя, Отец наших Боже, благословен еси.
Ты из Иеросолима проповедав всем Евангелие, объят же окрест всю землю, Павле, даже до конец Иллирика уча взываше, Отец наших Боже, благословен еси.
В ужасе взят быв, третие достигл еси небо, пребогате, и услышав неизглаголанная словеса, зриши славу превышнюю, Отца и Сына, во сияние же сообразно, испытующаго яве, Духа Божия глубины.
Богородичен: Якоже на руно дождь, на Тя сниде, Дево, Христос Бог, и плотоносец из Тебе пройде, соединяя прежде разстоящая. Мир на земли и на небеси даруя, иже отец наших Бог, благословен еси.

Песнь 8.

Ирмос: Иже всяческая нося неизглаголанною Твоею силою, Христе, преподобныя Твоя отроки в пламени оросил еси, зовущия, благословите вся дела Господня Господа.
Воздежут твои руце и ко кресту тя опояшут, Владыка предрек, Петре. Повелевает последовати зовущу, благословите вся дела Господня Господа.
Благодати словом, Енея убо слячена люте, Тавифу же умершую, чюдодействуя воскресил еси, зовущую, благословите вся дела Господня Господа.
Иже Петрови языки очищены поведав Христе, духовною зарею, и мне помышления очисти, зовущу, благословите вся дела Господня Господа.
Богородичен: Всесвятая Дево, яже Бога Слова рождшая плотию, души моея мрак Твоими молитвами отгнавши, просвети, взывающа, благословите вся дела Господня Господа.

Ин.

Ирмос: Иже на горе святей Прославленнаго, и в купине огненней Моисеови тайну явльшаго Господа, пойте и превозносите Его во веки.
Содержася любовию Ти Павел, добрым же изменением изступи. Hе себе бо живяше славный, имяше же, Щедре, живуща в себе Тя, Христе, во веки.
Ты обручи якоже невесту представити, Жениху Христу Церковь, невестовожь бо сей показася Павле богоносе. Темже Тя славит во вся веки.
Подвизася добрым подвигом и скончав течение свое законно, сокровище веры соблюл еси. Темже венцем Павле сподобися праведным.
Богородичен: Радуйся, Престоле огнезрачный Господень, радуйся, двере невещественнаго блистания, радуйся, облаче, Солнце возсиявшая праведное, Егоже превозносим во веки.

Песнь 9.

Ирмос: Тя Преславную Hевесту, и Пресвятую Богородицу, Зиждителя рождьшую, видимых же всех и невидимых, песньми величаем.
Твоя преизящная благодать славится достойно, сени твоей, страсти немощных Петре отгонящи. Темже тя величаем.
Мечтанми Симона волхва, богоборца взята к воздушней высоте, низложь неизглаголанною Божественною силою, Петре треблаженне.
Согрешением разрешение мольбами своими подаждь, просвещение же сердцу, и веселие духу, поющым память твою, апостоле.
Твоя вся исполнена славы, освящания же и чюдес, мощи, перст, и верою Петре поклоняемом и любовию, божественным веригам.
Богородичен: Твое имя Плод чрева содея ликовника песнь пети Тебе, иже радость рождьши, велегласно радуйся провещавающа.

Ин.

Ирмос: Уставы прейде естества, Зиждителя заченши твари, и дверь спасения мiрови бысть. Тем Тя Богородице непрестанно величаем.
Твоей поклоняемся веризе, юже по Христе яко злодей носил еси. Язвы же Павле облобызаем, яже на славнем твоем и победоноснем быша телеси.
Hыне разрешися апостоле, ко Иже тобою непрестанно желаемому. С Hим же яко служитель водворяяся, непрестанными мольбами своя рабы к себе привлецы.
Hыне никакоже в гаданиих, ниже в зерцале Христо тебе зримь есть. Лицем же паче зрится к лицу, совершен тебе разум открывая Божества.
Богородичен: Ты Пресвятая Богомати, похвала Христовем апостолом бысть, мучеником же слава, и пророком основание. Темже вернии Тя вси достодолжно величаем.

Светилен.
Подобен: Жены услышите.

Апостолом вси верховники воспоем, Петра и Павла, божественныя вселенней светилники, проповедники вере, богословныя трубы, учением сказатели, церковныя столпы и разорители льсти. (дважды)

Богородичен
Совета великаго Ангела Отча, родила еси Христа, Всепетая Отроковице, Царя славы. Егоже Крест апостоли проповедавше, просветиша языки, и научиша Тя Богородицу славити, и поклонятися Твоему Рождеству.

 

<< назад на "БОГОСЛУЖЕНИЕ"